Айыл чарба продукцияларын чет өлкөгө ташуучулар үчүн милдеттүү патенттин өзүнчө ставкасын киргизүү демилгеленди

Бүгүн, 16-мартта парламенттин Агрардык саясат, суу ресурстары, экология жана аймактык өнүгүү комитетинин жыйынында Экономика министрлиги айыл чарба продукцияларын экспорттогон жүк ташуучулар үчүн милдеттүү патенттин өзүнчө ставкасын киргизүү боюнча мыйзам долбоорун демилгеледи.

Аталган министрликтин статс-катчысы Айдай Курманалиеванын айтымында, салыктын суммасын эсептөө үчүн төмөнкүдөй салыктык база жана салыктык ставка колдонулмакчы. "1 автомашинанын жүгү менен салмагына ылайык, төмөнкү ставкалар белгиленди: 4 тоннага чейин - 300 сом, 4 тоннадан 8 тоннага чейин - 600 сом, 8 тоннадан 12 тоннага чейин - 900 сом, 12 тоннадан жогору - 1200 сом. Айыл чарба продукцияларын экспорттоо боюнча кызмат көрсөтүүгө патент жүгү менен автоунаанын ар бир чыгуусуна сатып алынат. Патент 30, 90 же 180 күнгө алынат. 90 күндүк патент алууда салыктын суммасы 5 пайызга, ал эми 180 күнгө алууда 10 пайызга азаят",- деп билдирди Курманалиева.