Кыргыз улуттук аскер лицейинде Улуу Жеңиштин 70 жылдыгына карата туура 70 көчөт отургузулат

24-мартта Советтер Союзунун Баатыры, генерал-майор Дайыр Асанов атындагы Кыргыз улуттук аскер лицейинде 70 көчөт отургузулат. Мындай акция Улуу Ата Мекендик согуштун ардагерлерине ыраазычылык билдирүү максатында Улуу Жеңиштин 70 жылдыгына жана ошол каргашалуу согуштан кайтпай калгандардын элесине арналат.

Иш-чарага КРнын Коргоо министри Абибилла Кудайбердиев, Республикалык ардагерлер кеңешинин башчысы Тараз Токомбаев, генерал Д.Асановдун жубайы Жамалбүбү Асанова, КР Коргоо министрлигинин офицерлери жана лицейдин тарбиялануучулары катышары күтүлүүдө.

Ушундай эле иш-чара КР Куралдуу күчтөрүнүн Аскер институтунда да өтөт. Көчөттөр “Айлана-чөйрөнү коргоо” республикалык фонду тарабынан берилди.

Автор: Максат Кудайбердиев