Кудайберген Базарбаев, министр: "Биздин максат - элге балык эмес, кайырмак берүү"

Социалдык өнүгүү министри Кудайберген Базарбаев БУУнун Азык-түлүк программасынын өкүлү Рам Саранамутту менен бирге Ош облусундагы "Эмгек үчүн өндүрүш" долбоорунун жыйынтыгына карата жыйын өткөрдү.

Аталган долбоор Талас, Нарын, Ош, Жалал-Абад жана Баткен облустарындагы 27 айыл өкмөткө караштуу 170 айылда ишке ашырылып келгенин билдирет министрлик. "Кыргыз мамлекетинде учурда 103 миң жакыр үй-бүлө жашайт. Алар ай сайын социалдык жөлөк пулдарды алышат. Биздин максат - алардын кыйынчылыктан кутулушуна жардам берүү, экономикалык жактан көз карандысыз болушуна көмөктөшүү. Башкача айтканда, аларга балык эмес, кайырмак берүү",- деди министр Базарбаев.

БУУнун өкүлү долбоордун алкагында суу каналдарын калыбына келтирүү, өсүмдүк өстүрүүнү колдоо, дарыя жээктерин бекемдөө иштери жүргөнүн кошумчалады.

Автор: Автандил Добулбеков