Жогорку Сот Данияр Нарымбаевди камакта калтырды

Жогорку Сот коррупция боюнча айыпталган Данияр Нарымбаевге карата биринчи инстанциянын чечимин күчүндө калтырды. Бүгүн, 9-сентябрда Жогорку Соттун Жазык иштери жана административдик укук бузуулар жөнүндөгү иштер боюнча соттук коллегиясы президенттик аппараттын мурунку жетекчиси Данияр Нарымбаевге карата бөгөт коюу чарасын карап, Бишкек шаарынын Октябрь райондук сотунун 2015-жылдын 23-июлундагы чечимин күчүндө калтырды. Тагыраак айтканда, Нарымбаевди тергөө аяктаганга чейин Кыргыз Республикасынын Улуттук коопсуздук мамлекеттик комитетинин тергөө абагында 2015-жылдын 15-сентябрына чейин камакта калтыруу чечими кабыл алынды.

Эскерте кетсек, Октябрь райондук соту 23-июлда Нарымбаевди 2 айга камакка алуу чечимин чыгарган. Бул чечимди Бишкек шаардык соту 12-августта күчүндө калтырган.

Данияр Нарымбаевге 22-июлда Кылмыш кодексинин “коррупция”, “пара алуу”, “кызмат абалынан кыянаттык менен пайдалануу” беренелери боюнча айып тагылып, УКМКнын СИЗОсуна убактылуу камакка алынган эле. Экс-чиновник "Бишкектин мурунку мэри Нариман Түлеевдин иши Жогорку Сотто каралганда жардам берүүнү убадалап, анын жакындарынан ири суммада пара алган" деп күнөөлөнүүдө. Бул чуулгандуу окуя менен кененирээк бул жактан тааныша аласыз.

Автор: Автандил Добулбеков