“Каракол шаарындагы баш аламандыкка катышкан” деп кармалган журналист бир айга камакка алынды

"2013-жылдын 7-октябрында Каракол шаарындагы баш аламандыкка катышкан" деп кармалган журналист бир айга камакка алынды. Бул тууралуу бүгүн, 2-августта журналисттин жактоочусу Номанжан Аркабаев билдирди.

“Кечээ журналист Кенжебек Жумабаевдин баш коргоо чарасын Бишкек шаарынын Биринчи Май райондук соту карап, аны УКМКнын тергөө абагында бир айга камоо чечимин чыгарды”, - деди Номанжан Аркабаев.

УКМК: "1971-жылы туулган Кенжебек Жумабаев мурда козголгон кылмыш ишинин негизинде 30-июль күнү кармалып, убактылуу кармоочу жайга киргизилди", - деп билдирүү тараткан.

Ал эми жактоочу Номанжан Аркабаев журналист эч күнөөсү жок камалып жатканын айтууда.

Айта кетсек, 2013-жылдын 7-октябрында Каракол шаарында баш аламандык орун алып, анда ошол учурдагы өкмөттүн Ысык-Көл облусундагы өкүлү Эмилбек Каптагаев барымтага алынган. Мунун негизинде “барымтага кармоо”, “массалык баш аламандык”, “мамлекеттик кызматкердин өмүрүнө кол салуу” беренелери боюнча кылмыш иши козголгон.

Автор: Бекжан Рыскулов