ИИМ: "Соңку бир жума аралыгында 19 зордуктоо кылмышынын бети ачылды"

Соңку бир жума аралыгында 19 зордуктоо кылмышынын бети ачылды. Бул тууралуу бүгүн, 5-июнда Ички иштер министрлигинин басма сөз кызматынан билдиришти.

Маалыматка ылайык, 29-майдан 4-июнга чейин республика боюнча 2154 кылмыш иши катталган. Анын ичинен 1801инин өздүгү такталган. Кылмыш иликтөөгө тиешелүү 526 факт катталып, анын ичинен 327 кылмыштын бети ачылса, 75 кылмыш изи сууй электе ачылган.

"Мурда болгон 216 кылмыштын бети ачылды. Тоноочулук боюнча 7 кылмыш ишинин бети ачылса, 1 денеге залал келтирүү, 19 зордуктоо, 236 алдамчылык, 62 уурулук, 1 мал уурулук жана 1 унаа уурдоо фактысынын бети ачылган. Ошондой эле 124 килограммдан ашуун баңгизаты алынган", - деп билдирди басма сөз кызматы.

Автор: Акназар Сулайманкулов
Фото: Интернеттен алынды