Лондондогу көп кабаттуу үйдөн чыккан өрт кырсыгына бузук муздаткыч себеп болгон

14-июнда катталган Лондондогу өрттүн келип чыгышына бузук, оңдолбогон муздаткыч себеп болгон. Мындай маалыматты жергиликтүү полиция BBC News басылмасына билдирди. Буга чейин аталган имаратка атайын өрт коюлушу мүмкүн деген божомолдор чындыкка жатпайт. Мындан тышкары көп кабаттуу үйдүн курулуш материалдары коопсуздук талаптарына жооп бербей тургандыгын полиция тастыктаган.

Полициянын айтуусунда азыр имаратты куруп, колдонууга берген компаниялардын үстүнөн текшерүүлөр жүрүп жатат. Иликтөө иштери бүткөн соң окуяга кырсык деген баа берилип, тиешелүү адамдарга атайылап жасалбаган кылмыш иши катары айып тагылышы мүмкүн. Жергиликтүү бийликтин акыркы маалыматтарына ылайык көп кабаттуу үйдөн каза болгондордун саны 79га жеткен.

Автор: Темирлан Токтосун уулу