Сот Салянованын адвокатына дааратканага чыгууга уруксат бербей, акыйкатчынын суранычы менен гана тыныгуу жарыялады

Бүгүн, 22-сентябрда Бишкек шаарынын Ленин райондук сотунда Жогорку Кеңештин оппозициялык "Ата Мекен" фракциясынан депутат Аида Салянованын иши каралып, жарыш сөз жүрүүдө. Отурумга Салянованын фракциялаштары Садык Шер-Нияз, Каныбек Иманалиев жана акыйкатчы Кубат Оторбаев келип катышууда.

Отурумда коомдук жактоочу жарыш сөздү сүйлөп жатат. Жактоочулар соттон тыныгуу берүүнү суранып, бирок сот суранычты канааттандырган жок. Бирок жактоочу Чынара Жакупбекова анын дааратканага чыгуусу керек экенин айтып, сот ага каршы чыгып ортодо пикир келишпестик келип чыкты. Ушул учурда залдагы Салянованын тарапташтары соттун имаратында бардык дааратканалар жабык экенин айтып, шарт түзүлбөгөн деп нааразычылык билдиришти. Бирок жактоочу соттун айтканын укпастан кадыресе муктаждыктарга сотто да тыюу сала албасын айтып чыгып кетти. Сот анын чыгып кеткенин протоколго киргизүүгө катчысына буйрук берди.

Салянованын жактоочулары сотко келген акыйкатчы Кубат Оторбаевге сот тыныгууга уруксат бербей жатканын, имараттагы дааратканалардын баарынын эшиктерин атайын жаап салып жатышканын айтышты. Буга нааразы болгон акыйкатчы соттон тыныгуу берүүнү сурады. Сот 5 мүнөттүк тыныгуу жарыялап кеңешме бөлмөсүнө кирип кетти.

Автор: Кенжебай Сатканалиев
Фото: Кенжебай Сатканалиев