Якутияда диний багыттагы гимназиянын директору бачабаздыкка айыпталып 17 жылга кесилди

Якутиянын Хангалас райондук соту Ыйык-Иннокентьевск диний окутуу гимназиясынын иеромонахы, директору Мелетияны (Андрей Ткаченкону) балдарга карата бачабаздыкка айыптап, соттоду. Сот аны күчөтүлгөн тартипте 17 жылга кести. Маалыматты жергиликтүү маалымат булактары Якутиянын Жогорку Сотуна таянып жазды.

Мелетияга 2017-жылы 14 жаштан ылдыйкы балдарга карата сексуалдык мүнөздөгү аракеттерди кылып, өзгөчө оор кылмыш жасаган деп 87 эпизоддун негизинде айып тагылган.

Ошондой эле кылмышкер жабыр тарткандардын баарына компенсация төлөөгө милдеттендирилди. Диний окутуу гимназиясынын мурдагы директору Мелетия камакта күчөтүлгөн тартипте гана отурбастан, психиатрдын көзөмөлүндө да болот. Якут Епархиясы кылмышкерди диний титулунан ажыратты.

Автор: Гүлжан Асанкожоева