Баткен жана Ош облустарында тажик тараптын кол салуусунан келтирилген зыянды аныктоо иштери жүргүзүлүп баштады

Атайын түзүлгөн комиссия кыргыз-тажик кагылышуусунан келтирилген чыгымды аныктоо иштерин баштады. Бул тууралуу бүгүн, 20-сентябрда ӨКМнын куткаруучуларды даярдоо мамлекеттик борборунун башчысы Ырысбек Жолдошбаев маалымат жыйында билдирди.

"Учурда кыргыз-тажик чек арасындагы согуштук аракеттерден кийин Баткен жана Ош облустарында келтирилген зыянды аныктоо жана кыйратууларды аныктоо боюнча атайын комиссия иштеп жатат", - деп билдирди Ырысбек Жолдошбаев.

Алдын ала маалыматтар боюнча, куралдуу кагылышуу учурунда төмөндөгүлөр жок кылынган:

Турак жай имараттары – 364;
Кошумча имараттар - 168;
Социалдык объектилер – 9 (мектеп – 5, бала бакча – 3, ФАП – 1);
Стратегиялык объекттер - 5; Кыймылсыз мүлк жана жашоону камсыз кылуучу объектилер - 149;
Транспорт - 9.
Жолдошбаев белгилегендей, бул акыркы маалыматтар эмес, бардык аймакты, объектилерди изилдөө жана келтирилген зыянды баалоо боюнча иштер уланууда.