Жалпы республикалык тестирлөөгө кечиккен абитуриенттер үчүн кошумча каттоо жарыяланат

Жалпы республикалык тестирлөөгө кечиккен абитуриенттер үчүн кошумча каттоо жарыяланат. Бул тууралуу бүгүн, 9-июнда КРнын Билим берүү жана илим министрлигинин басма сөз кызматынан билдиришти. Маалым болгондой, каттоо 10-июндан тартып 18-июнга чейин Бишкек шаарында №24-мектеп-гимназиясында жана Ош шаардык билим берүү башкармалыгында жүргүзүлөт.

Кечиккендер үчүн тестирлөө 20-21-июнь күндөрү Бишкек жана Ош шаарларында өткөрүлөт. Тестирлөө жүргүзүлө турган даректер каттоодон өтүп жаткан учурда маалымдалат.

Белгилей кетсек, бул тестирлөө 2015-жылы ЖРТга кайсы бир себептерге байланыштуу катыша албай калган гана абитуриенттер үчүн жүргүзүлөт жана ага тестирлөөдөн четтетилген (дисквалификация болгон) абитуриенттер катыша алышпайт.

Кошумчалай кетсек, жалпы республикалык тестирлөө быйыл 19-22-май күндөрү өткөрүлгөн.

Автор: Наргиза Бекжанова
Фото: Интернеттен алынды