Темир Сариев Таш-Көмүр шаарында өрт кырсыгынан каза болгон 3 жаштагы эгиз балдардын жакындарына көңүл айтты

Жалал-Абад облусундагы Таш-Көмүр шаарындагы 3 жаштагы эгиз балдардын өмүрүн алган өрт кырсыгына байланыштуу премьер-министр Темир Сариев каза болгондордун жакындарына көңүл айтты. Бул тууралуу 11-июнда өкмөттүк аппараттан билдиришти.

Бул сыяктуу кайгылуу окуялардын кайталанбашы үчүн премьер-министр Өзгөчө кырдаалдар министрлигине, өкмөт алдындагы Экологиялык жана техникалык коопсуздук инспекциясына жергиликтүү өз алдынча башкаруу органдары менен биргеликте өрт коопсуздугун сактоо жана алдын алуу боюнча иш-чараларды иштеп чыгууну тапшырды. Ошондой эле өрт чыкчу каражат жана жабдыктарды колдонуу эрежелери тууралуу калкка маалымат берүү тапшырмасын берди.

Муну менен катар Темир Сариев бул сыяктуу окуялардын кайталанбашы үчүн ата-энелерди балдарын кароосуз калтырбоого чакырды.

Автор: Жамалидин Парманкулов