Өкмөт башчы Кыргыз улуттук университетинин ректору болуп жаңыдан дайындалган Чынара Адамкулованы кабыл алды

Бүгүн, 15-июнда өкмөт башчы Темир Сариев Жусуп Баласагын атындагы Кыргыз улуттук университетинин жаңыдан дайындалган ректору Чынара Адамкулованы кабыл алды. Өкмөттүн маалымат кызматы жолугушууда аталган окуу жайдагы реформа талкууланганын билдирди.

Премьер-министр бул университеттин өлкө үчүн маанисин белгилеп, аталган окуу жай реформага муктаж экенин билдирди. “Сизге абдан чоң милдеттер жүктөлдү. Мезгил азыр жаңыча иштөөнү талап кылып жатат”,- деди Темир Сариев.

Чынара Адамкулова көрсөтүлгөн ишенимди аткарууга бардык аракетин жумшай турганын убада кылды.

Эскерте кетсек, аталган окуу жайдын ректорун шайлоо былтыр 18-октябрда өткөн. Анда талапкер Алтай Бөрүбаев алдыга чыккан эле. А.Бөрүбаев 214 добуш алса, экинчи орунду (161 добуш) КУУнун Кыргыз-Кытай институтунун директору Болот Токтобаев, үчүнчү орунду (153 добуш) окуу жайдын Кыргыз-Европа факультетинин деканы Чынара Адамкулова ээлегени жарыяланган. Бирок шайлоо мыйзам бузуулар менен өткөнүн айтышып айрым талапкерлер сотко арызданышкан. Соттук териштирүүлөргө байланыштуу окуу жай жарым жылдан ашык ректорсуз калды.