Германиянын Өнүктүрүү банкы өлкөнүн агрардык тармагын өнүктүрүү багытында 9 миллион евро бөлөт

Жогорку Кеңештин Бюджет жана финансы боюнча комитети Кыргыз Республикасы менен Германиянын KfW Өнүктүрүү банкынын ортосундагы "Агрардык өндүрүү-сатуу удаалаштыгын каржылоо, биринчи этап BMZ № 2013 654 44 жана 2013 700 14" долбоорун каржылык колдоо жөнүндө келишимдин долбоорун 15-июнда жактырып, парламенттин кароосуна алып чыга турган болду.

Келишимге ылайык, Германиянын Өнүктүрүү банкы кыргыз мамлекетинин агрардык тармагын өнүктүрүү багытында 9 миллион евро өлчөмүндө гранттык каражат бөлөт. Каражат 2 транш аркылуу берилмекчи. Ал өлкөнүн агрардык тармагын Евазиялык экономикалык биримдигинин шарттарына даярдоо багытында жумшалат.

Андан сырткары Япония өкмөтү кыргыз мамлекети чакан жана орто бизнестин товарларын берүү менен долбоордук эмес, гранттык жардам бере турганы белгилүү болду. Каржы министри Адылбек Касымалиевдин айтымында, Япониянын жардамы кыргыз жерине техника жана товар түрүндө берилип, алар толугу менен бажы алымдарынан бошотулат.

Автор: Жамалидин Парманкулов