Кыргыз Республикасынын айрым мыйзам актыларына толуктоолор жана өзгөртүүлөр киргизилди

“Кыргыз Республикасынын айрым мыйзам актыларына толуктоолорду жана өзгөртүүлөрдү киргизүү жөнүндө” Кыргыз Республикасынын мыйзамына президент Алмазбек Атамбаев кол койгонун президенттик аппараттан билдиришти.

Мыйзам Жогорку Кеңеш тарабынан 2015-жылдын 31-декабрында кабыл алынган.

Мыйзам Салык кодексине жана “Салык кодексин ишке киргизүү жөнүндө” мыйзамга түзөтүүлөрдү киргизет жана Кыргыз Республикасынын ЕАЭБге мүчө болуусунун шарттарында сатуудан салыкты этап-этап менен жоюу жолу аркылуу Кыргыз Республикасынын салык системинин атаандашуу жөндөмдүүлүгүн камсыз кылууга багытталган.

Алсак, 2016-жылдын 1-январынан тартып товарларды, жумуштарды, кызмат көрсөтүүлөрдү экспорттоодон жана аларды Кыргыз Республикасынын аймагынан тышкары сатууга салынган салык алынып салынат. КНС боюнча каттоо чеги 2 эсе көбөйтүлгөн (4 миллион сомдон 8 миллион сомго чейин).

Ошол эле учурда 2016-жылдын 1-июлунан тартып сатуудан салыктын төмөндөгү ставкалары бекитилет: КНС салынган жана (же) төлөнгөн КНС бошотулган товарларды, жумуштарды, кызмат көрсөтүүлөрдү сатууда:
а) накталай 1 пайыз өлчөмүндө – соода ишмердиги үчүн жана башка ишмердик үчүн – 2 пайыз;
б) накталай эмес формада 0 пайыз өлчөмүндө.

Сатуудан салык ставкасы банктар үчүн 2 пайыз жана уюлдук байланыш тармагындагы ишмердүүлүк үчүн 5 пайыз каралган. Мыйзамда товарларды, жумуштарды, кызмат көрсөтүүлөрдү сатууда накталай төлөнгөндө жөнөкөйлөштүрүлгөн систем боюнча бирдиктүү салыктын ставкалары эки эсе төмөндөтүлгөн. Ошону менен бирге тамак-аш жана айыл чарба азыктарын кайра иштеткен өнөр жай ишканалары үчүн колдонуудагы киреше салыгы жана КНС боюнча жеңилдиктер 2018-жылдын 1-сентябрына чейин сакталат.

Мыйзам 2016-жылдын 1-июлунан тартып күчүнө кирген айрым ченемдеринен башкалары 2016-жылдын 1-январынан тартып күчүнө кирет.

Автор: Жамалидин Парманкулов