Чет өлкөлүк коммерциялык эмес уюмдардын ишин жөнгө салууга багытталган мыйзам долбоору каралды

Бүгүн, 14-апрелде Жогорку Кеңеште өлкө аймагында иш жүргүзгөн чет өлкөлүк коммерциялык эмес уюмдардын ишин жөнгө салууга, каржылык ачык-айкындуулугун камсыз кылууга багытталган мыйзам долбоору каралып, экинчи окууда добуш берүүгө жөнөтүлдү.

Мыйзам долбоору биринчи окууда кабыл алынган долбоорунан кыйла айырмаланып турат. Мыйзам долбоору аркылуу "Коммерциялык эмес уюмдар жөнүндө", "Юридикалык жактарды, алардын өкүлчүлүктөрүн мамлекеттик каттоо жөнүндө" мыйзамдарга, КРнын Кылмыш кодексине негизинен эки өзгөртүү киргизилүүдө: биринчиси – "эл аралык коммерциялык эмес уюм" деген түшүнүк чечмеленип берилет, экинчиси – алар ачык-айкын иш жүргүзүп, өз бюджетин жарыялоого тийиш.

Юстиция министри Жылдыз Мамбеталиева өкмөт бул мыйзам долбоорун колдой турганын билдирди.

Белгилей кетсек, Кыргыз Республикасында 1,5 миңден ашуун чет өлкөлүк коммерциялык эмес уюм иштейт. Мыйзам долбооруна ылайык, чет өлкөдөн каржыланган өкмөттүк эмес уюмдардын баары мамлекеттик каттоодон өтүп, каржылык чыгымдары тууралуу отчёт берүү менен аларды жарыялап турууга тийиш.

Автор: Жамалидин Парманкулов