Мароккодо кар жаады. Бул өлкөдө карлуу кыш мындан 50 жыл мурун болгон

Түндүк Африкадагы Марокко өлкөсүнө акыркы 50 жылдан бери кар жаай элек болчу. Чет элдик маалымат булактары көп жылдык кургакчылыктан кийин аталган өлкөнүн жашоочулары ак карды көргөндүгүн жазышууда.

Ага ылайык, абанын температурасы Марокконун чыгыш, түштүк-чыгыш жана түштүк жагында төмөндөп, кар көбүрөөк жааган. Андагы чөлдөр жана оазистер ак карга бөлөнгөн. Карды күтпөй жашаган калк ага таңданып турган чагы. Туристтик шаар деп эсептелген Уарзазат жана Тарудант шаарларынын жашоочулары пальмаларды, үйдүн чатырларын, унааларды, бассейн, вилла жана жолдорду кар баскан тейде көрүштү.

"50 жылдан бери бул жакта кыш кургакчылык менен коштолчу. Жарым кылымдан кийин гана жашоочулар карлуу кышты көрүп жатышат", - дешкен жергиликтүү улуттук метеорологиялык кызматтын өкүлдөрү.

Жаратылыштын бул кубулушуна кубангандардын арасында чана жана лыжа тебүүнү каалагандар көп болуп, Мишлиффен жана Хабри тоолорунда кышкы оюндарды ойноп, ырахаттанып жаткандыгы жазылган маалыматта. Жергиликтүүлөр мындай кышты күтпөгөндүктөн сууктан жүдөп жаткандар да четтен чыгат. Жолдун тайгактыгынан унаалардын жүрүшү кыйындаган, кээ бирлери жылуу кийимдин жоктугун айтышса, арасында үйүн жылуулай албай жаткандар да бар.