Бүгүн, 4-октябрда Жогорку Кеңештин VII чакырылышынын депутаттыгына талапкерлерди шайлоо өттү. SUPER.KG порталы шайлоо участкаларынан, аймактардан жана чет өлкөлөрдөн добуш берген жарандар, ар кандай кызыктар, мыйзам же тартип бузуулар тууралуу маалыматтардын топтомун сунуштайт.
"Реформа" партиясынын лидери Клара Сооронкулова шайлоодо добуш бере албай калды
Ал Ош облусундагы мыйзам бузуулардын алдын алуу максатында аталган аймакка жөнөгөнүн билдирди. Кийинчерээк №5271 шайлоо участкасында ал депутаттыкка талапкер экенин айтканына карабай, аны шайлоого катыштырбай, чыгарып салышкан.
Байкоочу: "Шайлоо участкаларына орнотулган пандустар колдонууга ыңгайсыз"
Бишкектеги шайлоо участкаларынын 79 пайызына ден соолугунун мүмкүнчүлүгү чектелген жарандар үчүн пандустар орнотулган. Бирок пандустар колдонууга ыңгайсыз экенин №1327 шайлоо тилкесиндеги байкоочу айтып берди.
"Бул жылы бир топ жылыштар бар. Алсак, ден соолугунун мүмкүнчүлүгү чектелгендер жана улгайган адамдар үчүн пандуска чыга бериште атайын чакыруу кнопкасы жайгаштырылган. Аны басканда жардамчылар келип, ичке алып кирип жатышат. Бирок дагы деле шарт жок. Анткени бизде орнотулган пандустар эл аралык стандартка туура келбейт. Толугу менен бул шилтемеде.
Паспортун берип, акча алып жаткан кыздын видеосу тарады
Тасмада кыз паспортун унаада отурган кишиге берди. Ал сүрөткө тартып алган соң кызга паспортту жана акча бергенин көрүүгө болот. Видеону көрүү үчүн
шилтеме.
Автоматтык эсептөөчү урналардан алдын ала алынган маалыматтар боюнча "Мекеним Кыргызстан" партиясы алдыда
Саат 20:00гө карата шайлоо тилкелеринде добуш берүү токтотулуп, автоматтык эсептөөчү урналардан алдын ала маалыматтар алынды. Ага ылайык, "Мекеним Кыргызстан" саясий партиясы алдыда келе жатат. Эске салсак, автоматтык эсептөөчү урналардын эсеби расмий деп саналбайт. Тизмедеги кийинки партия кайсы экенин бул
шилтемеден окуй аласыз.
Окурман шайлоонун бүтүшүнө жарым саат калганда аппарат иштебей калганын айтат
SUPER.KG порталынын "Элдик кабар" бөлүмүнө окурман шайлоонун бүтүшүнө жарым саат калганда №8077 шайлоо участкасында бюллетень салынуучу аппарат иштебей калганын айтты. Видеону көрүү үчүн
шилтеме.
Чет элдеги мекендеш: "Швейцарияда добуш берүү үчүн 184 Кыргыз жараны катталган"
Швейцариянын Женева шаарында үй-бүлөсү менен эмгектенип, жашап жүргөн мекендешибиз Жеңишбек Эдигеев аталган өлкөдө шайлоо кандай өткөндүгү тууралуу SUPER.KG порталына айтып берди.
"Кыргыз өлкөсүндөгүдөй эле бул жакта дагы эртең мененки 08:00дөн кечки саат 20:00гө чейин добуш берүү үчүн эшик ачык болот. Кыргыз өлкөсүнүн Швейцариядагы элчилиги Женева шаарында жайгашкан. Ошондо элчилик консулдук маселелер боюнча 5 өлкөнү камтыйт. Жалпы Швейцарияда добуш берүү үчүн 184 Кыргыз жараны катталган. Элчи Данияр Мукашов шайлоого карата уюштуруу иштерин жакшы даярдаптыр", - дейт ал. Толугу менен бул
шилтемеде.
Борбордук шайлоо комиссиясынын төрайымы Нуржан Шайлдабекова шайлоонун алгачкы алдын ала жыйынтыгы менен тааныштырды
"Алдын ала маалыматтар боюнча, 2 миң 39 шайлоо тилкесинен жыйынтыктар келди. 1 миллион 604 миң 562 шайлоочу катышты", - дейт ал. Добуш берүүнүн жыйынтыктары улам-улам жаңыланып турат. Саат 20:30га карата көрсөткүч менен бул
шилтемеден окуңуз.
Саясатчы Өмүрбек Текебаев шайлоо учурунда бюллетенди сүрөткө тарткан деген маалымат тараган
Бул боюнча журналист
Динар Турдугулова SUPER.KG порталына айтып берди.
"Текебаев бюллетенди сүрөткө тартып жатат" деген күлкү келээрлик маалымат таратып жатышат. Шайлоо өтүп жаткан күнү да Текебаевди жамандап калыш керек. Шайлоо учурунда анын колунда телефон эмес, көз айнектин футляры болгон". Толук маалымат бул
шилтемеде.
Москвадагы мекендештер шайлоого активдүү катышты
Москва шаарында жашаган Кыргыз жарандары быйылкы шайлоодо өзгөчө активдүүлүгүн көрсөтүп жатышканын Борбордук шайлоо комиссиясынын төрагасынын орун басары Акылбек Эшимов айтып берди.
"Москва шаарында үч шайлоо участкасы иштеп жатат. Ал жерлердр 50гө жакын ыктыярчы иштеп жатат. Мындан тышкары Русгвардия дагы жардам берүүдө. Бул жакта шайлоочулар өздөрүнүн активдүүлүгүн көрсөтүп жатышат. Орусияда биринчи жолу десем адашпасам керек". Кененирээк бул
шилтемеден окуй аласыз.
"Кара-Кулжадагы шайлоо участкасындагы шайлоочулардын баары "Биримдикке" добуш берди" деген сүрөт тарады
Кара-Кулжа районунун жыйынтыктоочу отчётунун дүмүрчөктөрү социалдык тармактарга тарады. Анда Кара-Кулжа районундагы №5011 шайлоо участкасындагы эл бир гана "Биримдик" партиясына добуш беришкен. Интернетке тараган дүмүрчөктө калган партиялар эч кандай добуш албаганы көрүнөт.
БШК: "Шайлоо фондуна жалпы 668 миллион 864 миң 906 сом каражат түштү"
Шайлоо убагында партиялардын шайлоо фонддорунун атайын эсептерине 668 миллион 864 миң 906 сом каражат түшкөн. Ага ылайык, шайлоо мезгилинде саясий партиялардын шайлоо фонддорунун атайын эсептерине 668 864 906 сом которулуп, 668 582 779 сом сарпталганы маалымдалат.
Саясий партиялардын шайлоо фонддорунун атайын эсептериндеги акча каражаттарынын келип түшүшү жана чыгымдалышы жөнүндө маалымат менен таанышуу үчүн бул шилтемеге өтүңүз.
Шайлоонун алгачкы алдын ала жыйынтыктары айтылды
Борбордук шайлоо комиссиясынын төрайымы Нуржан Шайлдабекова саат 23:30га карата шайлоонун алгачкы алдын ала жыйынтыгы менен тааныштырды.
Жалпы 2 миң 475 шайлоо тилкеси бар, 2 миң 412 тилкесинен маалымат келди. Шайлоого 1 миллион 965 миң 211 жаран добуш берди. Кайсы партияга канча шайлоочу добуш берди? Алдын ала жыйынтыкты бул шилтемеден окуй аласыз.
