Ак таңдай акын, аткаруучу, обончу Элмирбек Иманалиев 1978-жылы 17-январда Токтогул районуна караштуу Өзгөрүш айылында туулган. Ал төрт жашынан манас айтып, тамга таанып, китеп окуп баштаган. Алгачкы эле окуган китеби "Манас" эпосу болгон.
Мектепте окуп жүргөндө ар кандай кароо-сынактарга катышып жүрүп, төкмө акындык өнөрү боюнча тушоосу 6-классында кесилген.
Алгач "Нооруз" майрамында төгүп ырдап, эл оозуна алына баштаган. Жаш таланттын кабары төкмө акын Тууганбай Абдиевге жетип, ал шаарга алып кеткен. 15 жашында "Айтышка" катышып, "Айтыш-93" фестивалында баш байгени жеңип алган.
Мектепти аяктаган соң Улуттук филармониянын алдындагы эки жылдык студияда окуп, андан кийин Бүбүсара Бейшеналиева атындагы искусство институтунун (азыркы искусство университети) фольклор бөлүмүн бүтүргөн.
Төкмө акын жаш чагынан ар кандай эл аралык айтыштарга катышып, бир нече ирет баш байгени жеңип алган. 2016-жылы Кыргыз Республикасынын Эл артисти наамын алган.
Эмгек жолун чыгармачыл өспүрүмдөрдүн республикалык "Сейтек" борборунда иштөөдөн баштаган. Андан кийин Кыргыз улуттук филармониясында, Чүй облустук драма театрында уланткан.
Алгачкы сүйүүсү ырчы Гүлбү Ороскул кызына 15 жашында жолугуп, 1995-жылы баш кошуп, 15 жыл чогуу түтүн булатып, кийин эки айрылыш жолго түшүшкөн. Эки таланттын ортосунда Айзуура жана Сезим деген кыздары бар.
Акын 2009-жылы Нурзат Абдрашитовага баш кошуп, алар 3 уул, 1 кыздын бактылуу ата-энеси болушкан. Акындын өмүрлүк жары кесиби боюнча медицина кызматкери.
Акын өмүрүнүн аягына чейин "Айтыш" коомдук фондунда 50дөн ашуун улан-кыздарга устаттык кылып, төкмөлүк боюнча сабактарды өтүп келген.
Элмирбек Иманалиев калың журтка акындык эле эмес, манасчылык, дастанчылык, обончулук өнөрлөрү менен да белгилүү. Ага таандык "Балкыма", "Мунарым", "Жалгыздыктан тажап бүттүм", "Жамгырдагы кусамат", "Жолукпай койгун эми", "Коштошуу вальсы", "Булбулум", "Аруузатым" чыгармалары бар.
Элдин сүймөнчүгүнө айланган төкмө акын ушул жылдын 20-апрелинде оорудан улам мезгилсиз дүйнөдөн кайткан.
