Жогорку Кеңештин 23-октябрдагы жыйыны башталууда. Бүгүн "Кумтөр" маселесин кароо улантылат

Жогорку Кеңештин 23-октябрдагы жыйыны башталууда. Эскерте кетсек, бүгүн депутаттар "Кумтөр" маселеси боюнча өкмөт сунуштаган долбоорго чекит коёт. Премьер-министр Жантөрө Сатыбалдиев сунуштаган меморандум парламенттин өткөн апталардагы жыйындарында каралып, көпчүлүк депутаттар аны колдобой турганын билдиришкен. Бул маселе боюнча ЖКнын тийиштүү комитети даярдаган токтом кайра иштеп чыгууга кайтарылган, токтомдун даяр варианты бүгүн белгилүү болот. Меморандумда "Кумтөр" боюнча канадалык тарап менен биргелешкен ишкана түзүү сунушу камтылган.

Эске салсак, 1993-жылы "Кумтөр" келишими жаңы түзүлгөндө Кыргызстандын үлүшү 67 пайыз болчу. "Кумтөр" 10 жылдан кийин толугу менен Кыргызстан тарапка өтмөк, бирок андай болгон эмес. Келишим өзгөртүлүп, кыргыз тараптын үлүшү улам азайып отуруп 33 пайызга чейин түштү. Учурда айрым саясатчылар алгачкы келишимге кайтып, үлүштү 67 пайыз кылууну, айрымдар "Кумтөрдү" 100 пайызга мамлекетке алууну талап кылып жатат. Ал эми өкмөт пайданын 50х50 пайыздан бөлүнүшү туура деген позицияны карманууда.

Автор: Автандил Добулбеков