Бостериде тоого кетип келе албай калган балдар куткарылды

Ысык-Көлдүн Бостери айылындагы Тегерек жайлоосуна кетип, кайра келе албай калган балдар куткарылды. Бул тууралуу Өзгөчө кырдаалдар министрлигинен кабарлашты.

Кечээ, 13-февраль күнү кечинде Бостери айылынын Тегерек жайлоосуна 4 өспүрүм бала чыгышкан. Балдардын бири кулап, бутун оорутуп алып тоодон түшө албай калышкан.

Өз алдынча тоодон түшүүгө аракет кылган балдар суукта үшүп, жардамга муктаж экендигин билдирген.

Мындан улам Ысык-Көл райондук ӨКБдан жерине тез арада 4 куткаруучу авариялык куткаруу унаасы менен жөнөтүлгөн.

Издөөнүн натыйжасында бутунан жаракат алган бала жана шериктери аман-эсен табылып, Чолпон-Ата шаардык бейтапканага жеткирилген.

Автор: Азат Бейшенбеков