Бишкекте дүкөндөн акча уурдаган шектүү кармалды

Бишкекте дүкөндөн акча уурдаган шектүү кармалды. Бул тууралуу бүгүн, 14-февралда Октябрь РИИБинин басма сөз кызматы билдирди.

Маалыматка караганда, 2-февралда Октябрь РИИБге Б.З. аттуу жаран арыз менен кайрылган. Ал ошол эле күнү "Орто-Сай" базарындагы дүкөндөрдүн бирине белгисиз жаран кирип, 78 миң сомун уурдап кеткенин айткан.

Бул факты боюнча Кылмыш-жаза кодексинин 205-беренесине (Уурдоо) ылайык кылмыш иши козголгон.

Шектүү катары 2003-жылы туулган У.А. аттуу жаран кармалып, убактылуу кармоочу жайга киргизилген.

Учурда анын ушул сыяктуу кылмыштарды жасоого катыштыгы бар экендиги аныкталууда.