"Туулган күнүмдө кофеканам ачылып жатат" дейт 32 жашка толгон актёр Самат Эркинбеков

Бүгүн, 16-мартта актёр, тамашоучу Самат Эркинбеков 32 жашка толду.

"Түнү саат он экиден өткөндө ырчы инилерим келип куттукташты. Бул жылкы туулган күнүм Орозо айына туш келгендиги менен өзгөчөлөндү. Өздүк майрамымда кофеканабыздын экинчи филиалы ачылып жатат. Ошол жактан кечинде ооз ачып, досторум менен белгилейм. Негизи туулган күнүмө анчейин маани бере бербейм, бирок жакындарың куттуктап, жакшы каалоолорун арнашса абдан жагымдуу болот экен", - дейт ал.

Ошондой эле алдыда чыгармачылыгын кино тармагында улантарын кошумчалады.

Самат Эркинбеков 1992-жылы Токмок шаарында туулган. 2008-жылы Бишкек шаарынын Ак-Өргө конушундагы №77 мектепти бүтүрүп, 2009-жылы медициналык училищеге тапшырган. 2012-жылы тиш техниги адистигине ээ болгон.

Самат Эркинбеков "Тамашоу" долбооруна 2007-2008-жылдары "Ак-Өргө City" командасы менен катыша баштаган. "Тамашоудон" сырткары "Мачо", "До+Фа", "До+Фа-2", "Көк салкын", "Көк салкын-2", "Пентхаус", "Браво", "Гонщик таксист", "Жора+Гуля" тасмаларында, "Шерине" сериалында роль жараткан. Ошондой эле кыргыз эстрада ырчыларынын клиптеринде образ жаратууга да жетишкен.