Тайырбек Жумашбек уулу ирандык балбанды беттеш бүтөрүнө 1 секунд калганда жеңип алды

Кыргызстандын эркин күрөш курама командасынын мүчөсү Тайырбек Жумашбек уулу Бишкекте өтүп жаткан Азия чемпиондугунун финалына чыкты.

Кыргызстандык балбан 61 килограмм салмак категориясында турнирдин экинчи айлампасынан тартып катышууда. Алгач 1/8 финалда түндүк кореялык атаандашы Кум Чол Рини 5:0 эсебинде жеңип, 1/4 финалга чыккан.

Жарым финалда ал ирандык Резу Атринаргхарчи аттуу балбан менен кез келди. Беттеш бүтрүнө 1 секунд калганда кыргыз балбаны 7:7 эсебинде жеңилип жаткан. Ал акыркы секундда 4 упайлык ыкма жасап, эсеп санын 11:7ге айлантып, жеңишке жетти.

Муну менен кыргыз балбаны Азия чемпиондугунун финалына чыкты.

Эске салсак, ушул тапта “Бишкек Арена” муз аянтчасында спорттук күрөштүн түрлөрү боюнча Азия чемпиондугу өтүүдө.