Министрлер кабинетинин төрагасынын биринчи орун басары Адылбек Касымалиев Евразия экономикалык комиссиясынын кеңешинин кезектеги жыйынына видео-конференция-байланыш режиминде катышты. Өкмөттүн басма сөз кызматынан билдиргендей, күн тартибинде 20га жакын маселе каралып, анын жыйынтыгында бир катар чечимдер кабыл алынды.
Маалыматка ылайык, Евразия экономикалык комиссиясынын кеңешинин мүчөлөрү терефтал кислотасына жана анын туздарына импорттук бажы алымынын нөлдүк ставкасын эки жылга узартуу чечимин кабыл алышты. Терефтал кислотасы жана анын туздары негизинен полиэтилентерефталат полимерлерин алуу үчүн колдонулат, тамак-аш өнөр жайы үчүн желим бөтөлкөлөрдү, плёнкаларды жана таңгактоочу контейнерлерди өндүрүү үчүн сырьё катары колдонулат.
Мындан сырткары 2027-жылдын 30-апрелине чейин ЕАЭБдин бирдиктүү бажы тарифинин импорттук бажы алымдарынын ставкасын анид жиптеринин айрым түрлөрүнө 0 пайыз деңгээлинде белгилөө чечими кабыл алынды. Анид жиптеринен жасалган техникалык кездемелер машина куруу өнөр жайында (автомобиль, учак, кеме куруу, темир жол ж. б.), ошондой эле курулушта, айыл чарбасында жана атайын кийимдерди өндүрүүдө колдонулат.
Ошондой эле чакан суюлтулган табигый газ өндүрүү жана сатуу объекттерин куруу, жабдуу жана тейлөө үчүн жабдуулардын, тетиктердин айрым түрлөрүн бажы алымдарынан бошотуу түрүндөгү тарифтик жеңилдиктерди берүү жөнүндө чечим кабыл алынды. Тарифтик жеңилдик 2 жылдык мөөнөткө, импорттолуучу товарлардын арналышын ырастаган шартта берилет.
Тамак-аш азыктарын маркировкалоо маселесин чечүү үчүн шаарлардын, райондордун, көчөлөрдүн аталыштары өзгөртүлгөн учурда Евразия экономикалык комиссиясынын кеңеши тарабынан Бажы бирлигинин “Тамак-аш азыктарынын коопсуздугу жөнүндө” "Тамак-аш азыктары алардын маркировкасына” карата техникалык регламентине өзгөртүүлөрдү жана толуктоолорду киргизүү жөнүндө чечим кабыл алынган.
Ошондой эле Евразия экономикалык бирлигинин бажы аймагында ветеринардык дары-дармек каражаттарынын жүгүртүүсүн жөнгө салуу эрежелерине ветеринардык дары-дармек каражаттарынын айрым топторунун каттоо досьелерин Биримдиктин мыйзамдарынын талаптарына ылайык келтирүү тартибин, бул процедураны макулдашуу боюнча эмес, өз ара таануу схемасы боюнча жүргүзүү аркылуу жөнөкөйлөтүүнү караган өзгөртүүлөр киргизилди.
Кеңештин чечими менен Евразия экономикалык бирлигинин бажы аймагында убактылуу болушуна жана колдонулушуна убактылуу ташып келүүнүн бажылык жол-жобосуна ылайык ташып келүү бажы алымдарын төлөбөстөн жана салыктар (анын ичинде мындай убактылуу болуунун жана пайдалануунун шарттарын жана мөөнөттөрүн), ошондой эле убактылуу ташып келүүнүн бажы жол-жобосунун мөөнөтү 2 жылдан азыраак же көп болгон товарлардын категорияларынын тизмеси аныкталды.
Кабыл алынган чечим убактылуу ташып келүүнүн бажылык жол-жобосун укуктук жөнгө салууну оптималдаштырууга жана системалаштырууга, Бирликтин бажы аймагында товарларды бажы алымдарын төлөбөстөн убактылуу кармоонун жана пайдалануунун түшүнүксүз жана аткарылбай турган шарттарын жоюуга, салыктарды, ошондой эле бирдиктүү укук колдонуу практикасын түзүүгө мүмкүндүк берет.
Кеңештин мүчөлөрү Евразия өнүктүрүү банкынын колдоосу менен түзүлүп жаткан көндүмдөрдү жана кесиптерди өнүктүрүү боюнча эл аралык платформа тууралуу маалыматты укту.
Бул профессионалдык өнүгүү жана алдыңкы кесиптерди, технологияларды жана көндүмдөрдү жайылтуу үчүн кызматтардын кеңири спектрин сунуш кылган санариптик платформа. Ал Евразия экономикалык биримдигине мүчө мамлекеттердин жана башка кызыкдар өлкөлөрдүн экономикасынын жогорку технологиялык секторлорун жана маанилүү технологияларын өнүктүрүүгө багытталган.
