Париж-2024: Олимпиадада медаль уткан казак спортчусуна аэропорттон эле Toyota беришти (видео)

Париж шаарында өтүп жаткан жайкы Олимпиада оюндарында дзюдо боюнча медаль уткан коңшу казакстандык Елдос Сметов менен Гусман Кыргызбаев бүгүн, 5-августта Казакстанга кайтып барышты.

Аларды Алматы аэропортунан жык-жыйма эл тосуп алган. Медаль уткан дзюдочу Гусман Кыргызбаевге аэропорттон эле жаңы үлгүдөгү Toyota Land Cruiser 250 үлгүсүндөгү унаа мингизишти. Кызыл бантикке оролгон унаанын өзү аэропорттун унаа токтотуучу жайында ээсин күтүп турган.

Казакстандык дзюдочу Елдос Сметов 60 килограмм салмакта Париж Олимпиадасында алтын медаль тагынды. Бул анын алтын алууга үчүнчү аракети болуп, акыры көздөгөнүнө жетти.

Ал эми Гусман Кыргызбаев 66 килограмм салмакта Олимпиада оюндарында коло байге уткан.