Париж-2024: Жоламандын жарым финалдагы атаандашы аныкталды

Париж шаарында өтүп жаткан жайкы Олимпиада оюндарынын жарым финалына чыккан кыргыз балбаны Жоламан Шаршенбековдун жарым финалдагы атаандашы белгилүү болду.

Ал Жоламанга эзелки тааныш япониялык Кенчиро Фумита. Эки жолку Дүйнө чемпиону Олимпиадагы мыкты форма менен келгени даана байкалды. Ал чейрек финалда ирандык балбанды 9:0 эсебинде мөөнөтүнөн мурда жеңди.

Жоламан Фумита менен буга чейин эки жолу кез келген. Алар биринчи жолу 2020-жылы Азия чемпиондугунун финалында кез келип, Фумита 4:0 эсебинде жеңишке жеткен.

Экинчи жолу алар 2023-жылы Белградда өткөн Дүйнө чемпиондугунун финалында кез келген. Анда Жоламан Шаршенбеков 11:6 эсебинде жеңип алган.

Жарым финалдык беттештер Бишкек убактысы боюнча саат 01:00дө башталат.

Автор: Азат Бейшенбеков