Париж-2024: Акжол Махмудовго алгач эле эзелки атаандашы түштү

Кечээ, 5-августта Париж шаарында өтүп жаткан жайкы Олимпиада оюндарында күрөш боюнча экинчи чүчү күлак ташталды.

Анда 77 килограмм салмакта Акжол Махмудовго америкалык Камал Бей туш келди. Эки балбан 1/8 финалда күрөшөт.

Америкалык балбан 26 жашта. Ал 2019-жылдагы Пан Америка чемпионатынын күмүш медалынын ээси, 2023-жылкы Пан Америка чемпионатынын чемпиону жана 2024-жылдагы Пан Америка чемпионатынын коло байге ээси.

Акжол Махмудов Камал Амир Бей менен эки жолу беттешкен. Биринчи беттеш 2017-жылдагы өспүрүмдөр арасындагы дүйнө чемпионатынын финалында болгогн. Анда америкалык балбан 16:11 эсебинде жеңишке жеткен. Балбандар 2018-жылы өткөн өспүрүмдөр арасындагы дүйнө чемпионатында экинчи жолу беттешкен. Жыйынтыгында Акжол Махмудов реванш алып, 3-орун үчүн күрөштө Амир Бейди 8:1 эсебинде жеңип алган.

Андан бери чоңдор арасында эки балбан кез келе элек. Акжол Махмудов көптөгөн ири турнирлерде жеңишке жетип келсе, Камал Бей андай жыйынтык көрсөтө элек.

Камал Бей өз күчү менен Олимпиадага лицензия ута алган эмес. Эл аралык Олимпиада комитети ага орус балбаны Сергей Кутузовдун лицензиясын берген.

Беттештер Бишкек убактысы боюнча саат 15:00дө башталат.

Автор: Азат Бейшенбеков