"Алдыда алтын медаль алышыңар керек". Садыр Жапаров коло медаль уткан Акжол менен Үзүрдү куттуктады

Бүгүн, 8-августта президент Садыр Жапаров Олимпиадада коло медаль уткан кыргыз балбандары Акжол Махмудов менен Үзүр Жузупбековду телефон аркылуу куттуктады.

"Коло медаль алсаңар да кыргыз элиңер, Кыргызстаныңар силерди алтын уткандай жакшы көрөт. Ошондуктан көңүлүңөрдү чөгөрүп, башыңарбы ийбегиле. Эң негизгиси эли-журтуңардын сыйынан, сынынан кетпесеңер болду. Алтын медалдан артык алтын башыңар аман болсун. Спортту жакшы түшүнгөн адам катары айтайын, ар дайым жеңиш эле боло бербейт, татыктуу жеңиле да билиш керек. Дүйнө жүзү силерди грек-рим күрөшүн көркүнө чыгарган чыгаан балбандар катары жакшы тааныйт, сыйлашат. Ушуну унутпагыла. 3-орун дагы барктуу орун. Коло алдым деп капа болбогула. Баары Кудайдын колунда", - деди Жапаров.

Өз сөзүндө өлкө башчы спортчуларды кийинки оюндарга жакшылап даярданып, алтын медаль алышы керектигин айтты.

"Алдыда дагы кыл чайнашкан беттештериңер турат, ага да жакшы даярданып, мыктылыгыңарды далилдеп, алтын медалдарды алышыңар керек. Муну баары чыдамсыздык менен күтүп жатат. Силер баатыр Манастын тукумусуңар, муну эстен чыгарбагыла", - деди Садыр Жапаров.