Спорт департаменти Мунарбек Сейитбек уулунун билети боюнча үн катты

Олимпиададан өлкөгө кайткан учак билети спортчу катышып жаткан мелдеш аяктаган күнгө карап алынат. Бул тууралуу Дене тарбия жана спорт департаментинин директору Айбек Абдымомунов маалымат жыйында айтты.

Ал күмүш байге алган кыргыз мушкери Мунарбек Сейитбек уулуна "чейрек финалга чейин эле билет алынган" деген сын-пикирлерге жооп берди.

"Мелдеш бүткөндө кайра артка билет алынат. Жоламан Шаршенбеков менен Мээрим Жуманазарова мелдештин биринчи күндөрүндө күрөштү. Алар байге алгандан кийин 13-августта команда менен барат деп алардын билетин алмаштырдым. Мунарбектин мелдеши да 11-августка караган түнү аяктамак. Билет ошол күнгө алынган. Башкы машыктыруучулар өзүнүн программасын карап, кайсы мелдеш качан бүтөрүн көрсөтүп Улуттук Олимпиада комитетине маалымат берет. Биз ошого жараша билеттерди алабыз. "Финалга чыгабы, жарым финалда утулабы?" деп айтылган пикирлер жалган маалымат", - деди Абдымомунов.