Дмитрий Биволдун мурдагы аялы мушкердин атаандашы Канело аркылуу алимент алууну көздөдү

Бокс боюнча жеңил салмактагы дүйнө чемпиону, кыргызстандык мушкер Дмитрий Биволдун мурдагы жубайы Екатерина Бивол социалдык тармактын колдонуучуларын мексикалык Сауль Альвареске кат жазууга үндөдү.

Екатерина менен Дмитрий Бивол бир жыл мурун ажырашып кетишкен, бирок мурунку жубайы мушкерден алимент талап кылып келет. Анын пикиринде, мексикалык дүйнө чемпиону Сауль Альварес гана Биволду алимент төлөөгө көндүрө алат.

"Комментарийге "Канело" деп жазыңыздарчы. Мен үчүн эч ким туруп бере албайт. Ал гана жок эле дегенде ачык айта алат. Бул чоң аудиторияга ээ атактуу мушкер. Ал гана мага жардам бере алат. Сураныч, мага эмес, комментарийге "Канело" деп жазсаңыздар", - деп жазган Екатерина социалдык тармактагы баракчасына.

Дмитрий менен Екатерина Бивол экөө тең 16 жашында Санкт-Петербургдун аэропортунан таанышышкан. Жубайлар Мирон жана Никон аттуу эки уулдуу болушкан.

2023-жылдын апрель айында Екатерина Бивол жолдошу экөө эки ажырым жолго түшкөнүн билдирген.

Автор: Азат Бейшенбеков