Париж Олимпиадасында рекорд жаңылаган Сардана Трофимова Chevrolet Tracker унаасын алгандан кийин билдирүү жасады

Парижде өткөн жайкы Олимпиада оюндарына катышкан кыргызстандык жөө күлүк Сардана Трофимова бүгүн, 20-августта мамлекет берген сыйлыкты өз колуна алды.

Сүйүнүчү коюнуна батпаган жөө күлүк өзүнүн эмоциясы менен социалдык тармактагы баракчасы аркылуу бөлүштү.

"Бүгүн мен Кыргызстандын президенти Садыр Жапаровдун Париж Олимпиадасына катышкан спортчуларга берген белегин алдым. Кыргызстан Олимпиадада медаль уткан спортчуларды эле эмес, ага катышкан спортчулардын бардыгын сыйлаган жалгыз өлкө болду. Мен бул окуянын бир күнөөкөрү болгонума абдан сыймыктанам жана бактылуумун.

Өзүңүздөр билгендей Кыргызстан мага колдоочу эле эмес, жашоомдогу таянычым жана спорттогу карьерамдын күч-кубаты. Менин ыраазычылыгым чексиз", - деп жазды жөө күлүк социалдык тармактагы баракчасына.

Сардана Трофимова Париждеги Олимпиада оюндарына Кыргызстандын атынан марафондо чуркоо боюнча катышкан. Ал 14-болуп марага келип, Кыргызстандын Олимпиада оюндарындагы рекордун жаңылаган.

Олимпиадада 14-орунду алганы үчүн ал 500 миң сом жана жаңы үлгүдөгү Chevrolet Tracker унаасын алды.