Чүйдө тургундун 57 баш жылкысын алдап кеткен шектүүлөрдүн бири кармалды

Чүй облусунун Сокулук районунда тургундун жылкыларын сатып алып, акчасын бербей кеткен шектүүлөрдүн бири кармалды. Бул тууралуу облустук милиция бүгүн, 6-сентябрда билдирди.

Маалыматка ылайык, 26-августта райондук ички иштер бөлүмүнө 42 жаштагы жаран арыз менен кайрылып, 2 жигит алдап кеткенин түшүндүргөн. Арыз ээсинин айтымында, ал 24-июль күнү Фрунзе совхозунда жайгашкан короодон жалпы баасы 5 миллион 350 миң сомду түзгөн 57 баш жылкысын саткан. Алармандар 10 күндүн ичинде акчасын берүүнү убада кылып, бирок дайынсыз болуп кетишкен.

Бул факты боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон.

Аталган кылмышка шектүүлөрдүн бири катары 22 жаштагы жаран кармалып, убактылуу кармоочу жайга киргизилген.

Учурда тергөө иштери уланууда.

Автор: Кылымбек Бейшеев
Фото: Чүй ОИИБ