Көчмөндөр оюндары: Кыргызстандын Көк бөрү федерациясы Казакстанга нааразычылыгын билдирди

Кыргызстандын Көк бөрү федерациясы Астанада өтүп жаткан Дүйнөлүк көчмөндөр оюндарынын алкагындагы көкпар мелдешинин финалдык беттешинин жыйынтыгына нааразылык билдирди.

Бүгүн, 12-сентябрда Казанат ипподромунда Кыргызстан менен Казакстандын курама командаларынын финалдык беттеши өттү.

Биринчи таймда кыргыз спортчулары 3:1 эсебинде жеңишке жетишкен. Биринчи таймдын 13-мүнөтүндө Казакстандын курама командасынын оюнчусу камчы менен Кыргызстандын курама командасынын оюнчусун эки жолу чапкандыктан оюн жарым саатка үзгүлтүккө учурады. Жыйынтыгында камчы менен чапкан оюнчу 2 мүнөткө оюндан четтетилди.

Оюндун негизги убактысы 4:4 эсебинде тең чыгуу менен аяктап, кошумча таймда казакстандыктар жеңишти тартып алышты.

"Эрежеге ылайык, оюн аяктагандан кийин 20 мүнөттүн ичинде нааразычылык билдирүүбүз керек болчу. Биз жаздык. Акылбек деген сотту кетиришти." - дейт Кыргызстандын көк бөрү федерациясынын эксперти Рамис Кудайбергенов.