Казакстанда окуучулар дагы массалык түрдө уулангандыгы айтылды

Казакстандын Мангистау облусунда дагы 16 окуучу ууланды. Бул туурасында казак басылмалары облустук саламаттыкты сактоо башкармалыгына шилтеме берүү аркылуу жазышты.

Маалымдалгандай, 12-сентябрь күнү Бейнеу айылында мектептин окуучулары ичтери ооруп жаткандыгын айтып, райондук тез жардам бөлүмүнө кайрылышкан.

Тийиштүү медициналык кароодон соң окуучулар өз үйлөрүнө кайтышып, бүгүн, 13-сентябрда мектепке келишкен. Ал эми санитардык көзөмөлдөө кызматы тийиштүү экспертизаларды алышкан жана жыйынтыгын күтүп жаткандыгы маалыматта белгиленген.

Белгилей кетсек, өткөн жуманын аягында аталган облустун Бесшокы айылындагы мектепте 460 окуучу тамакка ууланып калгандыгы айтылган.

Автор: Замира Ниязбекова