Бишкекте Мамлекеттик тил күнү салтанаттуу белгиленди

Мамлекеттик катчы Сүйүнбек Касмамбетов Мамлекеттик тил күнүнө арналган салтанаттуу иш-чарага катышты. Бул тууралуу бүгүн, 23-сентябрда президенттин маалымат кызматынан билдиришти.

Маалыматка ылайык, бүгүн, 23-сентябрда мамлекеттик катчы Сүйүнбек Касмамбетов Токтогул Сатылганов атындагы Кыргыз улуттук филармониясында "Мамлекеттик тил жөнүндө” мыйзамдын кабыл алынгандыгынын 35 жылдыгына карата президентке караштуу Мамлекеттик тил жана тил саясаты боюнча улуттук комиссия тарабынан уюштурулган салтанаттуу иш-чарага катышты.

Ал иш-чаранын жүрүшүндө өлкө башчы Садыр Жапаровдун Мамлекеттик тил күнүнө карата куттуктоо сөзүн окуду.

Эске салсак, 1989-жылы 23-сентябрда Кыргыз ССРинин Жогорку Совети “Кыргыз ССРинин мамлекеттик тили жөнүндө” мыйзамын кабыл алган.