Депутат парламентте онлайн кумарканалар боюнча маселе көтөрдү (видео)

Жогорку Кеңештин бүгүн, 26-сентябрдагы жыйынында депутат Арсланбек Эгембердиев онлайн казинолордун ишин текшерүүнү сунуштады.

"Онлайн кумарканалар кыргыз жаштарынын түбүнө жете турган болду" деген эл өкүлү бул боюнча укук коргоо органдары кандай иш алып барып жатканы боюнча маалымат берүүнү өтүндү.

"Жакында эле бир жаш жигит жергиликтүү маалымат булактарынын биринде билдирүү жасады. "300 миң долларды уттуруп койдум" деп айтты. Ошол жерде ата-энеси "үйүбүздү сатууга аргасыз болуудабыз. Алты балам менен көчөдө калганы жатам" деп ыйлап айтты. Бул жерде менин күмөнүм бар – кылмыштуу топ болушу мүмкүн. Себеби аларга карызга акчаны ким берет? Күрөөсү жок акча беришпейт. Ал эми бул жаш жигиттерге күрөөсү жок акча беришет экен. Алар кумарканага уттурат", - деди эл өкүлү.