"Колдоо керек". Жаш кыргыз футболчулары эртең Бишкекте Түркмөнстан менен ойнойт

Футбол боюнча 20 жашка чейинкилер арасындагы Кыргыз курама командасы эртең, 27-сентябрда Бишкекте Түркмөнстанга каршы ойнойт.

Оюн Бишкектеги "Дөлөн Өмүрзаков" атындагы стадиондо саат 20:00дө старт алат. Ал эми футбол күйөрмандарын саат 18:00дөн баштап Freeman 996 атактуу ырчысынын катышуусундагы шоу-программа күтөт.

Эске салсак, Мирлан Эшеновдун жетекчилиги алдындагы Кыргыз жаштар курама командасы «I» тайпасында Мьянма, Түркмөнстан жана Япония командалары менен бирге жайгашкан. Турнирдин биринчи турунда курамабыз кечээ, 25-сентябрда Мьянманы 2:0 эсебинде жеңди.

Тандап алуу оюндарга жалпысынан 10 тайпага бөлүнгөн 45 курама команда катышууда. Азия биринчилигинин финалдык бөлүгүнө тайпанын жеңүүчүсү жана тайпада эң мыкты көрсөткүчтөр менен экинчи орунду ээлеген беш курама жолдомо алышат.

Стадионго келип, жаш оюнчуларыбызды башкы континенталдык турнирге жолдомого болгон күрөшүндө колдоңуз!

Билеттер www.kassir.kg сайтында жеткиликтүү!

Автор: Азат Бейшенбеков