Москвага учуп бараткан учактын бортунда массалык мушташ чыгып, учак шашылыш түрдө башка жерге конду

Москвага учуп бараткан учак борттогу массалык мушташтан улам багытын кескин өзгөртүп, шашылыш түрдө башка жерге конду. Бул тууралуу орус басылмалары жазышууда.

Окуя бүгүн, 14-октябрда Анадырь шаарынан учуп келе жаткан Боинг 777 учагында болгон. Жүргүнчүлөрдүн бири учактын салонунда ызы-чуу салып, жүргүнчүлөрдү кемсинтип, ошондой эле экипаж мүчөлөрүн чыр-чатакка чыгарды.

Стюардессалар жана башка жүргүнчүлөр ызы-чуу чыгарган адамды тынчтандырууну чечишкен, бирок ал авиакомпаниянын кызматкерлеринин бирине кол көтөрүүгө аракет кылган. Натыйжада ызы-чуу мушташка айланып кеткен.

"Учкучтар учууну токтотууну чечип, Красноярскка конууга аргасыз болушкан", — деп айтылат билдирүүдө.

Конгондон кийин жаңжал чыгарган адам полицияга өткөрүлүп берилген. Ал эми калган жүргүнчүлөрдүн арасында эч ким жабыркаган эмес. Бир канча убакыттан кийин учак көздөгөн жерине учуп кетти.