Орусия менен Украина каза болгондордун сөөгүн алмашышты

Украина менен Орусия каза болгон аскерлердин сөөгүн алмашты. Бул тууралуу орусиялык депутат Шамсаил Саралиев РБК агенттигине билдирген.

Маалым болгондой, Орусияга 89 аскер кызматкерлеринин сөөгү, Украинага 501 сөөк жеткирилген.

Орусиянын Коргоо министрлиги бул маалыматтарга комментарий бере элек.

Украинанын согуш туткундарын дарылоо боюнча координациялык штабы алмашуу Эл аралык Кызыл Крест комитетинин колдоосу менен ишке ашырылганын билдирди. Маалыматтарга караганда, 501 каза болгондордун 382си Авдиевка багытында, 56сы Бахмут багытында, 45и Марьинск багытында, калгандары Луганск, Запорожье же такталбаган аймакта өлтүрүлгөн.

Мурда каза болгон жоокерлердин сөөктөрүн алмаштырууну тараптар августтун башында жүргүзүшкөн. Анда 38 сөөк Орусияга, 250сү Украинага өткөрүлүп берилген.