"Тик учак коштоп кондуруп". Садыр Жапаров Казань шаарына жетти

Президент Садыр Жапаров бүгүн, 23-октябрда, иш сапары менен Татарстандын Казань шаарына барды. Бул тууралуу президенттин администрациясынан маалымдашты.

Мамлекет башчынын борту "Г.Тукай" атындагы эл аралык аэропортуна конду.

Президент Садыр Жапаровду Татарстандын башчысы Рустам Минниханов жана башка расмий адамдар тосуп алышкан.

"Аэропортто БРИКСке мүчө-мамлекеттердин желектери илинип, килем төшөлүп, ардак кароол тизилди. Улуттук кийимчен кыздар Садыр Жапаров менен учурашып, улуттук сый тамактарды тартуулашты.

Эскерте кетсек, сапардын алкагында президент Садыр Жапаров XVI БРИКС саммитинин мамлекет башчыларынын жыйынына катышат", - деп жазылат маалыматта.

Президенттин администрациясы жарыялаган сүрөттө мамлекет башчынын учагын атайын тик учак коштоп учуп келе жатканы көрүнөт.

Автор: Азат Бейшенбеков