Бейшеналиев кыргызстандык дарыгерлерди Түркиянын ооруканаларында окутуу маселесин талкуулады

Саламаттык министри Алымкадыр Бейшеналиев Түркиянын саламаттык сактоо министри Кемал Мемишоглу менен жолугушту.

Мекеменин басма сөз кызматынан билдиргендей, жолугушуунун жүрүшүндө тараптар эки өлкөнүн ортосундагы медицина тармагындагы кызматташунун келечегин жана артыкчылыктуу багыттарын талкуулашты.

Ошондой эле кадрдык камсыздоо, кыргызстандык дарыгерлерди Түркиянын ооруканаларында окутуу жана фармацевтика индустриясын өнүктүрүү менен дары-дармек каражаттарынын жеткиликтүүлүгүн камсыз кылуу маселелерине да көңүл бурулду.

Бейшеналиев Түркия өкмөтүнө жана Кемал Мемишоглуга Кыргызстандын саламаттык сактоо түзүмүнө көрсөткөн колдоосу үчүн ыраазычылык билдирди.

Министр Кыргызстан менен Түркиянын ортосундагы саламаттык сактоо тармагындагы алдыдагы эки тараптуу кызматташтыкка байланыштуу бир нече маанилүү маселелерге анын ичинен Кыргызстандын 150 жаранын түрк клиникаларында дарылоо боюнча квотаны калыбына келтирүүгө токтолду.

Автор: Айпери Бакталбек кызы