Ош облусунда шайлоого карата укук коргоо органдарынын гарнизондук саптык кароосу өттү

Бүгүн, 14-ноябрда Ош облусунун ички иштер башкармалыгында 17-ноябрь - жергиликтүү кеңештерге депутаттарды шайлоо күнүнө карата гарнизондук саптык кароо өткөрүлдү. Бул туурасында Ош ОИИБинин басма сөз кызматы билдирди.

Маалымдалгандай, башкармалыктын башчысы Нурланбек Бурканов жер-жерлерде шайлоо өнөктүгү учурунда жарандардын жана жол кыймылынын коопсуздугун камсыз кылууга бардык чаралар көрүлүп, милиция кызматкерлери өздөрүнө коюлган талап, милдеттерди аткарууга даяр экендигин билдирди.

"Облус аймагында шайлоо өнөктүгү учурунда жалпы 1200дөн ашуун кызматкер коомдук коопсуздукту камсыз кылат. Андан сырткары, коопсуздукту сактоого бир миңге чукул элдик кошуундар жана ички иштер органдарынын ардагерлери тартылат", - деп айтылат маалыматта.

Белгилей кетсек, Ош облусунда 7 аймактык шайлоо комиссиясы, 492 участкалык шайлоо комиссиясы, 58 айылдык кеңеш жана 3 шаардык кеңеш бар.