Пашинян ЖККУнун Астанадагы саммитине катышпайт

Армениянын премьер-министри Никол Пашинян 28-ноябрда Астанада өтө турган Жамааттык коопсуздук келишим уюмунун (ЖККУ) саммитине катышпайт. Бул тууралуу жергиликтүү 24News порталына Армения өкмөтүнүн төрагасынын басма сөз катчысы Назели Багдасарян билдирди.

"Армениянын ЖККУнун ишмердүүлүгүнө катышууну токтотуу боюнча позициясы өзгөргөн жок", - деген ал. Бул боюнча тышкы иштер министри Арарат Мирзоян да ушундай чечим кабыл алганын билдирген.

Эске салсак, буга чейин Пашинян “ЖККУ Армениянын коопсуздугуна, анын келечектеги жашоосуна жана эгемендигине коркунуч жаратат” деп ырастаган. Анын айтымында, уюмдун эки өлкөсү 2020-жылы Тоолуу Карабактагы аскердик операцияларда Азербайжанга жардам берген.