Бишкекте 65 жаштагы жаран бир адамды сүзүп, аны ооруканага алып бара жатып өзү каза болду

Бишкекте жөө өтмөктөн өтүп бара жаткан жаранды сүзүп кеткен унаанын айдоочусу каза болду. Мындай маалыматты Бишкек шаардык ички иштер башкармалыгы таратты.

Милициянын маалыматына ылайык, кырсык кечээ, 28-ноябрь күнү түштө болгон. Анда 65 жаштагы жаран Мерседес-Бенц Е320 үлгүсүндөгү унаасын Элебесов көчөсү менен түндүктү көздөй айдап бара жатып Февраль көчөсү менен кесилишкен жерден жөө өтмөктөн өтүп бара жаткан 1978-жылы туулган А. Н. аттуу жөө жүргүнчүнү сүзүп кеткен.

Алган жаракаттарынын кесепетинен 1978-жылы туулган А.Н. медициналык мекемеге жаткырылган. Ал эми айдоочу жабырлануучуну алып бара жаткан "Тез жардам" унаасын өзүнүн унаасы менен коштоп бара жатып, Фрунзе жана Тыныстанов көчөлөрүнүн кесилишине жеткенде күтүүсүздөн каза болгон.

Аталган фактылардын баары Бишкек шаарынын ички иштер башкы башкармалыгында катталып, тиешелүү экспертизалар дайындалган. Учурда тергөө иштери жүргүзүлүүдө.

Автор: Азат Бейшенбеков