Шакиев президент курулушка киргизилчү 12 пайыздык кошумча нарк салыгына каршы экенин айтты

Бүгүн, 5-декабрдагы Жогорку Кеңештин жыйынында Министрлер кабинети тарабынан сунушталган “Салык салуу чөйрөсүндөгү айрым мыйзам актыларына өзгөртүүлөрдү киргизүү жөнүндөгү” мыйзам долбоору биринчи окууда каралды.

Анда төрага Нурланбек Шакиев курулуш тармагына киргизилип жаткан 12 пайыздык кошумча нарк салыгына каршы чыгып, жыйындын алдында президент менен сүйлөшүп, аталган маселени талкуулаганын, өлкө башчысы да ушундай пикирде экендигин билдирди.

“Министрлер кабинетинин тийиштүү жетекчилери өлкө башчысына бул мыйзам долбоору боюнча туура маалымат жеткирбепсиздер. Президент угуп алып, абдан кабатырланды. Бул нерсе болбош керек болчу. Мен да курулуш тармагына кошумча нарк салыгынын киргизилишине каршымын. Биз ипотекалык программаларды жыргаганыбыздан ишке ашырып жаткан жокпуз. Жашоо шарты оор, мүмкүнчүлүгү чектелген, үйгө муктаж жарандарыбызды турак жай менен камсыздай албай жатып, кайра курулуш тармагына салыкты көбөйткөнүбүз туура эмес. Эгер жаңы салык киргизилсе, үйлөрдүн баасы дагы жогорулап, калкка бир топ кыйынчылыктарды жаратат. Демилгечилер бир пикирде болуп, такташып келсеңер болмок”, – деди Шакиев.

Ошондой эле ал демилгеленген мыйзамдан 12 пайыздык кошумча салыкка байланышкан беренени толугу менен алып салууну талап кылып, экинчи окууда долбоорду толугу менен өзгөртүү керектигин айтты.

Эскерте кетсек, кечээ парламент жыйынында депутат Балбак Түлөбаев өкмөт курулуш тармагына 12 пайыздык кошумча нарк салыгын киргизгени жатканын айтып, аны кескин сынга алган.