"Үйдө боштук пайда болду". Япониялык аткаминер Путин берген мышыктын өлүмү жалгызсыратканын айтты

Япониянын Акита префектурасынын губернатору Норихиса Сатакэ Орусиянын президенти Владимир Путин белек кылган мышыктын өлүмүнөн кийин үйдө боштук пайда болгонун билдирди. Ал бул тууралуу маалымат жыйында айтканын чет элдик басылмалар жазышты.

"Үйдө боштук сезими пайда болду. Адатта, таңга маал мени ойготчу. Анын өлүмүнөн кийин мен жана менин үй-бүлөм жалгызсырап калдык", - деген ал.

Ошондой эле губернатор мышыктын өлүмүнөн кийин гүл жана колдоо сөздөрү жазылган каттарды жөнөткөндөрдүн баарына ыраазычылык билдирген.

Белгилей кетсек, мышыктын өлүмү 3-декабрда белгилүү болгон. Кийинчерээк Сатакэ өлүмгө оору себеп болгонун тактаган.

2012-жылы жайында япон губернатору Путинге күчүк белек кылган. Бул 2011-жылдагы жер титирөөнүн кесепеттерин жоюуда Орусиянын көрсөткөн жардамы үчүн ыраазычылык катары жасалган. Орус лидери 2013-жылы буга жооп катары мышык белек кылган.

Автор: Кылымбек Бейшеев
Фото: Интернеттен алынды