Жазуучу жана котормочу Шаршеналы Абдылдаев каза болду

22-июнда Кыргыз Эл жазуучусу, маданиятка эмгек сиңирген ишмер, көрүнүктүү жазуучу жана котормочу Шаршеналы Абдылдаев узакка созулган оорудан улам 88 жаш курагында каза болду. Бул тууралуу бүгүн, 23-июнда Маданият, маалымат жана жаштар саясаты министрлигинен билдиришти.

Шаршеналы Абдылдаев 1937-жылы 12-майда Чүй облусунун Кемин районундагы Бейшеке айылында жарык дүйнөгө келген.
1956-1961-жылдары Кыргыз мамлекеттик университетинин филология факультетинин журналистика бөлүмүндө билим алып, чыгармачылык жана кесиптик жолун Кыргыз ССРинин мамлекеттик телерадиокомитетинде редакторлуктан баштаган.

Андан соң “Кыргызстан” басмасында, СССР мамлекеттик басма комитетинин Кыргыз бөлүмүндө, “Ала-Тоо” адабий журналынын редакциясында, Жазуучулар союзунун Кыргызстандагы адабият фондунда, ошондой эле Жогорку Кеңештин редакциялык-басма бөлүмүндө узак жылдар бою үзүрлүү эмгектенген.

Шаршеналы Абдылдаевдин чыгармачылык дүйнөсү кеңири жана көп кырдуу болгон анын калемине таандык повесттер, очерктер жана котормолор кыргыз адабиятын жаңы темалар менен байытып, улуттук адабиятты дүйнөлүк көркөм дөөлөттөр менен жакындаткан. Ал дүйнөлүк классиктер - Уильям Шекспир, Федерико Гарсиа Лорка, Георгий Марков, А. Упит жана башка көрүнүктүү жазуучулардын чыгармаларын кыргыз тилине чеберчилик менен которгон. Анын “Бийиктеги жылдыздар” повести, “Романтик”, “Сибирь”, “Отец и сын”, “Тоня из Семеновки”, “Грядущему веку” сыяктуу котормолору жана оригиналдуу чыгармалары кыргыз окурманынын сүймөнчүк адабиятына айланган.

Шаршеналы Абдылдаев Жазуучулар, Журналисттер жана Кинематографисттер союзунун мүчөсү болгон.

Жазуучунун эмгеги мамлекет тарабынан жогору бааланып, “СССРдин басма тармагындагы отличниги”, “Кыргыз Республикасынын эл жазуучусу”, “Кыргыз Республикасынын маданиятына эмгек сиңирген ишмер” наамдары жана бир катар мамлекеттик сыйлыктар менен сыйланган.

Ошондой эле ал кыргыз жана якут адабиятынын алакасын бекемдөөдө кошкон салымы үчүн Саха (Якутия) Республикасынын Ойунский атындагы мамлекеттик сыйлыгынын лауреаты болгон.

Маркумдун сөөгү Ала-Арча көрүстөнүнө коюлат.
Акыркы сапарга узатуу зыйнаты эртең, 24-июнь күнү, саат 10:00дө Москва көчөсүндөгү №209 үйдө өткөрүлөт.

SUPER.KG порталы Шаршеналы Абдылдаевдин үй-бүлөсүнө жана жакындарына терең кайгыруу менен көңүл айтат.

Автор: Ширин Марат кызы