Мурдагы полиция кызматкери көңүлдөшү бар экенин билип калган аялын өлтүрүп койду

Британиянын мурдагы полиция кызматкери Брайан Макманус жубайы Люсиль Энн Макманусту өлтүргөн деп Жоржияда өмүр бою эркинен ажыратылды. Бул тууралуу чет элдик басылмалар жазышты.

57 жаштагы киши Уорнер Робинс шаарындагы полицияга телефон чалып, аялы өз жанын кыйганын билдирген. Ал анын жансыз денесин ити менен сейилдөөдөн келгенден кийин тапканын айткан.

Бирок Макманустун жүрүм-туруму укук коргоо кызматкерлерине шектүү көрүнгөн. Ал аялынын өлүмүнө кайгыргандай көрүнгөн эмес.

Тергөө учурунда Макманустун Флоридада көңүлдөшү бар экени белгилүү болгон. Аны аялы телефонуна жазылган билдирүү аркылуу билип калган. Андан кийин күйөөсү экөөнүн ортосунда уруш чыгып, аялын өлтүрүп койгон.

Макманус буга чейин бир нече аялга сексуалдык мүнөздөгү коркутууларды жасагандыгы үчүн Лондон полициясынан бошотулган. Сот аны күнөөлүү деп таап, өмүр бою эркинен ажыратты.

Автор: Айсулуу Урустамова