Бишкекте аялдарга карата зордук-зомбулукка каршы, адам укуктарын коргоого багытталган тынч жүрүш болуп өттү (фоторепортаж)

Жөө жүрүш Жибек Жолу-Эркиндик бульварынын кесилишинен башталды.

Жүрүшкө жаштар гана эмес, улуу муундун өкүлдөрү да катышты десек жарашчудай.

Ар түрдүү чакырыктар ары-бери өтүп жаткан адамдардын да көңүлүн бурду.

Жөө жүрүштүн катышуучулары Эркиндик бульвары менен өйдө бет алууда.

Эски аянттагы парламенттин алдында бир нече убакыт туруп, ар түрдүү чакырыктарды кыйкырып айтып жатышты.

Кылмышкерлерге Кылмыш жана жаза кодексинин 129-беренесин эстетүү максатында ушундай плакат даярдалган.

Аялдын орду Ак үйдө!

Тилекке каршы, парламенттен эч ким чыккан жок, бирок ал жактын кызматкерлеринин көңүлүн бурганы терезеден карап жаткандардан байкалды.

Жөө жүрүш Чүй проспектисине чыккан жок, Жогорку Кеңештин капталына келип такалды. Ал эми кыйкырык, бирге айтылып жаткан ураандар милиция кызматкерлерин бул жерден арыраак болууну өтүндүрдү.

"Бул жерге турууга болбойт, тротуардан ары болгула" деп куугунтуктап жаткан кези.

Жарым сааттан ашуун убакыттан соң "Сообща" коомунун коомчулук менен байланышуу боюнча адиси кайрылуу ЖК депутаты Н.Никитенкого берилгендигин кабарлады.

Катышуучулар тарап жатканда ЖКнын дагы бир өкүлү сыртка чыгып дагы бир кат алып кайтты.

Бүгүн, 25-мартта Бишкекте жарандык активисттер “Кыргызстандагы аялдарга жана кыздарга болгон зордук-зомбулукту токтотуу” деген ураандын астында жөө жүрүшкө чыгышты. Адам укуктарын коргоо негизги максаты болгон жүрүшкө бейөкмөт уюмдардын өкүлдөрү катышты. Иш-чара саат 13:30да Жибек Жолу-Эркиндик көчөлөрүнүн кесилишинде башталып, катышуучулар жөө жүрүш менен Жогорку Кеңештин имаратынын алдына чейин келишти. Иш-чарада “Биз теңчилик жана адилеттүүлүк үчүн!”, “Кыргызстандагы зордук-зомбулук жана ксенофобияга каршы туруу үчүн пикирлештиктин жана биригүүнүн мезгили!” "Адам укуктары бар болсун, зордук-зомбулук жок болсун!”, “Ксенофобия, улутчулдук фашизмге жол ачат!” “Транссексуалдарды жектөөнү токтотобуз!" жана башка ушул сыяктуу ураандар айтылды.